အိမ်ခြံမြေ အကျိုးဆောင် များပြောသော အိမ်ခြံမြေဈေးကွက်

Posted by ရွှေဆဌဂံ ဂျာနယ် on April 29, 2013 // 0 Comments

အိမ်ခြံမြေ အကျိုးဆောင်များပြောသော အိမ်ခြံမြေဈေးကွက်

အိမ်ခြံမြေ အကျိုးဆောင် များပြောသော အိမ်ခြံမြေဈေးကွက်

ဦးသန်းဦး ( မြန်မာနိုင်ငံ အိမ်ခြံမြေ ၀န်ဆောင်မှုအသင်း )
*** မဏ္ဍိုင် အိမ်ခြံမြေ အကျိုးဆောင် ***

ဧပြီလကုန်ပိုင်း အထိဈေးကွက်သွက်စရာ အကြောင်းမရှိပါဘူး။ အငှားဈေးကွက်ရှိပေမယ့် အရောင်းအ၀ယ်ဈေးကွက်ကတော့ အဆင်သင့်မဖြစ်သေးပါဘူး။ မတ်လထဲမှာ ဖြစ်ခဲ့တဲ့ မငြိမ်မသက်မှုတွေရဲ့ အငွေ့အသက်တွေကြောင့် အိမ်ခြံမြေမှာသာ မကပဲ စီးပွားရေးကဏ္ဍတစ်ခုလုံးကို ရိုက်ခတ်ခဲ့တဲ့အတွက် ဈေးကွက်အေးနေပါတယ်။ အဲဒီ မငြိမ်သက်မှုတွေကြောင့် ပြည်ပလုပ်ငန်းရှင်တွေကို မျက်နှာသာပေးထားတဲ့ရင်းနှီးမြှုပ်နှံမှု ဥပဒေထုတ်ပေးထားတာတောင် သိသိသာသာ ၀င်ရောက်လာခြင်းမရှိသေးပါဘူး။ ခြုံငုံပြီးသုံးသပ်ရမယ်ဆိုရင်တော့ အခြားစီးပွားရေးလုပ်ငန်းတွေလိုပဲ မြန်မာ့အိမ်ခြံမြေဈေးကွက်လည်း သိသာထင်ရှားစွာကောင်းလာခြင်း မရှိသေးဘူးလို့ဆိုရမှာပါ။

————————————————————————–

ဒေါ်မို့မို့အောင် ( မြန်မာနိုင်ငံ အိမ်ခြံမြေ ၀န်ဆောင်မှုအသင်း )
*** ၀င်းရွှေဝါအိမ်ခြံမြေအကျိုးဆောင် ***

သင်္ကြန်ပြီးသွားပေမယ့် အိမ်ခြံမြေဈေးကွက်က နည်းနည်းငြိမ်သက်နေပါတယ်။ မေလဆန်းမှာတော့ ဈေးကွက်ပြန်လှုပ်ရှားလာမယ်လို့ထင်ပါတယ်။ နိုင်ငံခြားရင်းနှီးမြှုပ်နှံမှုနည်းနေသေးတဲ့အတွက် ဈေးနှုန်းသိပ်မကွာဟ လောက်ပါဘူး။ အခုဈေးကွက်အခြေအနေက အရင်ကလိုမဟုတ်တော့ပါဘူး။ ကား၊ ဒေါ်လာ၊ ရွှေ၊ အိမ်ခြံမြေ ဆိုပြီး စီးပွားရေးလုပ်ငန်းတွေ ခွဲပြီးလုပ်ကြပေမယ့် အခုအခြေအနေကအားလုံးကိုရောထွေးပြီးလုပ်ကိုင်လာကြတာတွေ့ရတယ်။ ရွှေဈေးကျနေတဲ့ အချိန်မှာအိမ်ခြံမြေ ဈေးကွက်ကို ရင်းနှီးမြှုပ်နှံချင်ကြပါတယ်။ ကမ္ဘာ့ရွှေဈေးကျနေတဲ့အချိန်မှာ သင်္ကြန်ဖြစ်ပြီး ရုံးတွေပိတ်နေလို့ မြန်မာ့အိမ်ခြံမြေဈေးကွက်အပေါ် အကျိုးသက်ရောက်မှုမရှိပါဘူး။ ရွှေဈေးနူန်းဆက်ပြီးကျဆင်းလာမယ်ဆိုရင်တော့ အိမ်ခြံမြေဈေးကွက်က လှုပ်လှုပ်ရှားရှားဖြစ်လာနိုင်ပါတယ်။

—————————————————————————-

ဦးအောင်မြင့် ( မန်နေးဂျင်း ဒါရိုက်တာ )
*** အောင်သမာဓိ အိမ်ခြံမြေ အကျိုးဆောင် ***

သင်္ကြန်ရက်အပြီး လေးငါးရက်အထိ ဈေးကွက်အေးနေပါတယ်။ လကုန်ပိုင်းကနေ ၀ါမ၀င်ခင်အထိတော့ ရောင်းဝယ်ငှားအလုပ်ဖြစ်မှာပါ။ သင်္ကြန်အပြီးကာလဖြစ်ပေမယ့် အိမ်ခြံမြေ ရောင်းဝယ်ငှားဈေးနှုန်းတွေ အတက်အကျမရှိနိုင်ပါဘူး။ လုံးချင်းမြေဈေးနူန်းတွေကတော့ သူ့တန်ကြေးနဲ့သူဈေးရနေပြီ ဖြစ်လို့ ထပ်မတက်နိုင်တော့ဘူးလို့ ယူဆရပါတယ်။ ကွန်ဒိုတိုက်ခန်းအငှားဈေးကွက်မှာတော့ ဈေးနှုန်းအနည်းငယ်မြင့်တက်လာနိုင်ပါတယ်။

————————————————————————-

ကိုသန့်စင်စိုး ( မန်နေဂျာ )
*** ဟိုးဟိုးကျော်အိမ်ခြံမြေ အကျိုးဆောင် ***

သင်္ကြန်အပြီးကာလ ဖြစ်ပေမယ့် နိုင်ငံရေး၊ စီးပွားရေး အခြေအနေသိပ်ပြီးမထူးခြားသေးတဲ့အတွက် ရန်ကုန်အိမ်ခြံမြေဈေးကွက်လည်း သိပ်ပြီးထူးခြားလာမှာ မဟုတ်ပါဘူး။
ဒါပေမယ့် သီလ၀ါဘက်မှာ ဂျပန်ကစီမံကိန်းလုပ်ငန်းတွေ ၀င်မယ်ဆိုတော့ အဲဒီဘက်မှာဈေးနှုန်းအနည်းငယ်အပြောင်းအလဲ ဖြစ်နိုင်ပါတယ်။ ရန်ကုန်အိမ်ခြံမြေရောင်းဝယ်ငှားဈေးကွက်ကတော့ ပုံမှန် တက်ရိုးတက်စဉ်အတိုင်းပဲ တက်နိုင်ပါတယ်။

——————————————————————————

မအိသက်လျာ ( မန်နေဂျာ )
*** လက်တွဲဖော် အိမ်ခြံမြေ အကျိုးဆောင် ***

ပြည်ပလုပ်ငန်းရှင်တွေဝင်လာရင် ဈေးပိုရနိုင်မလားဆိုတဲ့ အမြင်နဲ့ဈေးတင်ပြီး ခေါ်နေမယ်ဆိုရင် အခုလိုသင်္ကြန်ကာလာနှောင်းပိုင်းတွေမှာ အရောင်းအ၀ယ်အေးနေဦးမှာပဲ။ သင်္ကြန်အပြီးကာလမှာကားဈေးကွက်သွက်လာတဲ့အတွက် အငှားဈေးကွက် အနည်းငယ်မြင့်တက်လာနိုင်ပါတယ်။

—————————————————————————

ဦးချို ( အထွေထွေမန်နေဂျာ )
*** မိုးလွင်( မိဘမေတ္တာ) ***

သင်္ကြန်ပြီးလို့ ရုံးပြန်ဖွင့်ထားတာပဲရှိပါတယ်။ ဧပြီနောက်ဆုံးအပတ်အထိ ဈေးကွက်အေးနေပါဦးမယ်။ ဈေးကွက်ထဲမှာဝယ်လက်မဆင်းပေမယ့်ဈေးမကျသေးပါဘူး။ သင်္ကြန်မတိုင်ခင်ရော၊ သင်္ကြန်အပြီးကာလတွေမှာပါ အငှားဈေးကွက်နဲ့ ရုံးစားရိတ်ကြေအောင်လုပ်ဆောင်နေရပါတယ်။ မေလဆန်းပိုင်းကနေစပြီး ၀ါဝင်နေတဲ့အထိရန်ကုန်အိမ်ခြံမြေရောင်းဝယ်ငှားဈေးကွက်တစ်ခုလုံး ကောင်းလာမယ်လို့ပဲသုံးသပ်ထားပါတယ်။ အရောင်းအ၀ယ်ဈေးကွက်ကောင်းလာဖို့ကလည်းရောင်းခွန်ဝယ်ခွန်ပြုပြင်ပေးမပေးပေါ်မှာလည်း မူတည်နေပါတယ်။ အခွန်နှုန်းထားလျော်ပေးဖို့တောင်းဆိုထားပေမယ့်လည်းသေသေချာချာတွေ့ဆုံဆွေးနွေးမှုမျိုးတော့ မရှိသေးပါဘူး။

—————————————————————————-

ကိုမင်းနိုင် ( ကြယ်စင်လင်းအိမ်ခြံမြေ )
*** အကျိုးဆောင်လုပ်ငန်း ***

သင်္ကြန်ပြီးသွားပေမယ့်လည်း အိမ်ခြံမြေဈေးကွက်ကအလုပ်မဖြစ်သေးပါဘူး။
မေလဆန်းပိုင်းမှာစပြီး အလုပ်ဖြစ်မယ်လို့ပဲထင်ပါတယ်။ အိမ်ခြံမြေဈေးကွက်တင်မကပါဘူး၊ အခြားစီးပွားရေးလုပ်ငန်းတွေလည်း မေလထဲမှာပဲစပြီး ကောင်းလာမယ်လို့ထင်ပါတယ်။ မေလကနေ ၀ါမ၀င်ခင်အထိတော့ အိမ်ခြံမြေ လုပ်ငန်းတွေမြိုင်မြိုင်ဆိုင်ဆိုင် ဖြစ်လာမှာပါ။

——————————————————————————-

ကိုမောင်မောင်ကြီး
*** Excellent အိမ်ခြံမြေအကျိုးဆောင်လုပ်ငန်း ***

အိမ်ခြံမြေ ဈေးကွက်ကောင်းမကောင်းဆိုတာ သင်္ကြန်အပြီးကာလနဲ့တော့ သိပ်မဆိုင်ပါဘူး။ နိုင်ငံရေး၊ စီးပွားရေးအခြေအနေတွေကို အကဲခတ်ပြီး အရောင်းအ၀ယ်လုပ်ကြတာဖြစ်လို့ ပုံမှန်ထက်တော့ဈေးကွက်မပိုနိုင်သေးပါဘူး။ မြို့နယ်စွန်ဈေးကွက်ပိုင်းမှာတော့ မြောက်ဒဂုံကဈေးကွက်အကောင်းဆုံးဖြစ်နေတယ်။ သင်္ကြန်အပြီးဈေးကွက်ရဲ့ဈေးနှုန်း အကျဘက်တော့ မရှိနိုင်ပါဘူး။ လက်ရှိအခြေအနေမှာတော့ တက်ရိပ်ပြနေပါတယ်။

——————————————————————————

ဦးမင်းသူစိုး
*** Lucky Joint အိမ်ခြံမြေအကျိုးဆောင်လုပ်ငန်း ***

အိမ်ခြံမြေဈေးကွက် အခြေအနေကတော့ ဧပြီလကုန်ပိုင်းနဲ့ မေလဆန်းပိုင်းလောက်မှာ စတင်ပြီး လုပ်ငန်းတွေကောင်းလာမှာပါ။ အဲဒီအချိန်ကျမှ ပြောင်းရွှေ့မယ့်သူတွေကြောင့်ဈေးကွက်လှုပ်ရှားလာမှာပါ။
အရောင်းအ၀ယ်ပိုင်းကတော့ စောင့်ကြည့်ရဦးမှာပါ။ ဈေးနှုန်းဘက်ပိုင်းမှာတော့ အရောင်းဈေးတွေတင်ခေါ်နေပေမယ့် တကယ်တမ်းအရောင်းအ၀ယ်ဆိုင်တဲ့အခါမှာတော့ ညှိနှိုင်းပြီး ရောင်းဝယ်နေရပါတယ်။ ရောင်းဈေးကို ညှိနှိုင်းပြီး သတ်မှတ်နေရတဲ့သဘောမှာရှိပါတယ်။ အခုအချိန်က အငှားဈေးကွက်ကောင်းတဲ့ အချိန်အခါဖြစ်လို့ ဈေးနည်းနည်းပိုခေါ်လာနိုင်ပါတယ်။

Category : စီးပွားရေးသတင်း &သတင်း &အိမ်ခြံမြေသတင်း &အမေးအဖြေ &ပြည်တွင်းသတင်း